يا سيادةَ الرَئيس هاتلى حَق الشيخ عِماد ... واللى قتل مينا وجيكا وباقى الوِلاد

طب عايز حق روحي ... دة حتي مفيش شئ بيوحي .. انك خايف علينا

طيب مش انت جيت با لصندوق ... يبقي هاتلي حق من الحقوق

طب ليه لما بنقول حرية ... تطلق علينا كلاب الداخليه

دة حتى الكرامة مطلب بسيط ... يعنى مش لازم امشي جنب الحيط

 دة انا مهموم وصوتى بحّ من الهموم ... يعنى اللى انام فيه اصحى الاقيه

        خلاص افرح ياعم ... لا في مظاهرات ولا في هم

مبروك عليك كونى ساكت ... هسّكِت ضميري مادام الضماير ماتت

رسالة الشعب اللي لعن مليون مرة وسب ... اللى كل م يختار يطلع مدب

نصيبوا يعيش في جبروت .... لا وميلقي قوت .... وكمان في الطوابير يموت

طابور عيش بقي ... طابور بنزين ... ولاكأنينا بنى ادمين

الشعب ياريس كفر ... كل اللى نفسو فيه شنطة سفر

يهج من وشك يغور .... ويسبلك حتى الطابور

انا عبد بس مش عبد فلان انا عبد الله اللى من عبيد زيه متهان  

داء الوساخة في دم السلطة .... ودمنا احنا حلال للشرطة

وكمان حاصرو الهتافات ... وابن الكلب اللى مات ولا لي حق

دة حتى الخرطوش ... خسارة فيه ميستاهلوش ... دة عايز الحرق   

يعنى هنبقي دنيا واخرة محروقين ... طيب بزمتك دة يرضي مين

دة انا زفيري اسود من الهباب ... وصوتى بقي عواجيزي مبقاش شباب

         

   واللى اديتهم دمى طلعوا كلاب

            

 وبتلوموا علي الحمار اللى ثار 

صوت نفسو اللي كان بيخروش لسة في وداني .... وكل ضحكة ضحكتها معاه بتمناها تعود تاني

وكام حكاية عن صبرو ... وعن الزمن اللي نحل وبرو

كل حاجة مر بيها حكاها ... كل غنوة حافظها ... معايا غناها

دندنا كل لحن ... اتكلمنا في كل فن ... وقالي شوف السن :)

حكينا حبة عن جيكا ... ضحكنا واحنا بنسمع باندات مزيكا

كل حاجة ... حكينا ... لعبنا ... ضحكنا ... غنينا  بس خلاص انا دلوقتي بدون حد

بشكي حالي , لخيالى ... ولا هو راضي يرد

ولاكلامى عاد حد يسمعو .... م اصل خلاص مات اللي كان بيفهموا :(

دمعة فرت وانت بتركع .... يبقي انت لسة نفسك لربك ترجع

وايه قريتها ... وصفحة فريتها .... لان كلامها عليك ... طب اقراها 

تانى يمكن ربنا يهديك

وسورة بتحكيلك عن غفران ربك .... فتمسح دمعتك ويطيب قلبك

استغفر الخالق ... لو حقيقي ليه عاشق .... دة اللى الوحيد اللى 

معاك

ربك بس .... اللى الوحيد خوفو يطمن .... وحبو يتحس ... وتبقي 

من الفرحة هتتجنن

وكل م تحس انك قرفان .... اقرا ولو ايه من القران

وحتى لو كنت هتموت وتعبان ... هتلاقي الضحكة علي وشك 

وفرحان

انا كيان ماشي علي رجليه ... مسلم وحلمه مفرود علي ايديه

      
  كاره اللى الناس فارضينوا عليه

انا اللي بسكينة تلمة مدبوح ... من صراخ الحق صوتى منبوح

  انا المتهان فى كرامتو ولا عرف يقول ايه

انا المواطن البسيط ... اللى فى عين النظام عيل عبيط

برغم ان الحياة نازلة في تخبيط ... وهو مطنش ولا هنا عامل عبيط

انا نملة من جوعها فى الصخر بتكسر .... لا من كلام الناس بتبطل ولا بتتأثر

        لا عايزة الدلع في اكل السكر

دي عايزة العادى عايزة اللقمة ... او حتى الهدمة !!! او يبطلو يضربوها بالجزمة

  
   خدت الصدمة !!! وسكتتت ,,,, ليها حق والله تعبت

انا كلمتين ملهماش معنى ... وطن وحريه !!! ملهماش مكان في الزمن بتاعنا

هنلف بالوطن نبيعو ,,, والحرية ملهاش وزن علي ميزانا

وخبر البيع هنذيعوا ,,, والديموقراطية مهياش علي مزاجنا

انا اخر نفس باقي *** انا دم لخير الوطن ساقى

بس فى زمنى دة مش لاقي ؟؟؟؟ حتى كلمة شكر

لا وكمان بيحاربوا الفكر *** ويقولى معلش اصل السياسة مكر

       
       ويسمى شعري بلطجة وكفر

لم يتبق منى غير الصبر ... حتى قلمى قد نفذ منه الحبر

   ولكن لن يسكت لسانى الا عندما يسكن القبر

اه يا حزنى علي اللي بيحصل فيكى يا بلد ... ضاع الشعب واتكسر السند

شوف فى حكم سيادتو ,,,, كام شاب اتجلد ... خرفان هو وجماعتو ,,,, وكام فاسد اتولد

احبسنى , اقتلنى , لو غلطان تعالي حاسبنى ...  بس اعرف غلطى دة لو انا غلطان

   لو غلطتى هتحاسب عليها هى انى اديت صوتى للخرفان

انا ازاى اديت صوتى لواحد هربان ... معروف من يومو انو عيل جبان

افسدتوا الحياة بغبائكم المعهود *** واسستم للفساد رأس وعنقود

             
 فأنت كالسارق وعليه شهود

متبقاش منى غير حبة نفس ... ولو  مش عايزنى اتنفس هسيبوا جوايا يتحبس

         اتلم الدبان علي جثتي *** وقتل الخرطوش فرحتى

وانا زى كلب ولا اسوى ... هو مين علم اهلى القسوة

يمكن القضبان ,,, او يمكن الزمان ,,, خلاص اهو جيه اللى هيسكت اللسان

        اسمو مرسي و عصابتو اسمها الاخوان  

        تحت النجم كنت برقص ووصلت بالفرحة للارتعاش !!!!!!!!!!!

وانا بضحك ومرة واحدة النجم دة باش *** حتى ضيو اللى كان بينور بقي فلاش

وابتدى الفكر يدور في بالي *** وكل سؤال منطقى دخل خيالى

ليه اختفى ... طب ليه نورو انطفى .... يكون زعلان !!!!

م كان ساكت ... يمكن ضحكتو خافت ... واستخسرت انو يكون فرحان !!!!

النجم مات ويا الحلم ***  والسكوت علي الظلم بقي اسمو سٌّلمً !!!!

وادى النجم اشترط انو لو عاد *** نقف نستني كلنا في المعاد

انا عن نفسي معنديش مانع *** وايه المانع !!!! وغياب نورو عنى دة شئ واجع

النجم عارف انى انا اللى خايف بس راح ومش راجع !!!!

ساعة الفراق دماغى كان مهنج

بصرخ بصوت مش مسموع وعقلي كان متبنج

ايديا بترتعش ولسانى كان متشنج

حسيت في جسمى بالوجع

حسيت انى حد اتخدع

شفت في عين الناس الفجع

طيب حد  يقولى ويفكرنى بالشهادة

ولا شكلي نسيتها ومش حافظها كالعادة

ضيعت عمري في لفة سيجارة و شمة بودرة

بس مش قادر وحتى ايديا مش قادرة

ودة كلام مدمن ندمان

عاش ومات وضاع عمرو قبل الاوان

بدون مقدمات ... انا زهقت *** مش لاقى كلمات .. توصف انا تعبت !!!!

كل م اجي افكر في الحياة بشكل تاني *** تضربني ضربة تخلينى اعانى !!!!

مهياش راضية تريحنى *** كل م اتكلم تسيب الخلق وتيجى تسكتنى

نبرة صوتى بقيت زى سكوتى **** يعنى حياتى بقيت زى موتى

شيطانى الاخرس مات *** يعنى رجولتى مفيهاش سكات

حتى لو واخد حظى ومظلوم *** مش هسكت وارجع علي الحظ الوم

اه الحياه معايا صعبه *** بس لازم ارضي

الحياة والسكات بينهم خيط *** زى م السكات رضا الحياة ليها صيت

          وانا بالحياه مش بالسكات ارتضيت

مش كل حاجة في حياتك هتفرحك *** لازم يجى 

اللى يعيش بس عشان يجرحك

ومع كل

جرح هتتبدل ضحكتك اهات *** و الاه بتعلي 

لما يجى في بالك اللى فات

بس اصعب حاجة لما تفتكر حد مات *** وتفتكر 

ضحكتو و دمعتوا كل الاوقات

وتبقي عينك ماليها البكى وردك بس السكات 

*** وتتمنى لو العمر يرجع يومين وتوقف كل الساعات

                                    ويجيلك احساس الموت

احساس الموت دة مش ساهل *** مفيهوش لا 

مجنون ولا عاقل

بس بتفكر في ايه يستاهل *** عشان خاطر 

يكون الاحساس دة احساسي

                   يبقي احساسي دة مش 

هيفوت

كل حاجة في حياتى بدايتها بقيت زى نهايتها *** يعنى كل حاجة قابلتنى مفهمتش حكايتها

حتى الوجع باين في كل كلمة من لسانى *** الوجع اللى مقدرتش اوصفوا ولا حتى في ديوان اغانى

الوجع ذات نفسو بقي موجوع *** وصوتوا اتكتم معادش مسموع

دة حتي هتافي .... وكمان كلامي بقوا علم ملوش الوان !!!

وصوتى العالي بقي حمل علي كتافي...  يعنى نظامى ملوش مكان !!!

                  انا الالة وتروسها *** انا الحياة ودروسها

                  والحضن لما تنهشك بضروسها

وجودى عارف انو ملوش لزوم *** بس دة المفروض عليا

                    

   انى بعد نومى اقوم

ودة اللي اسمو الروتين *** يعنى اللي بعملو مبيتغيرش بالسنين

كارهو و هكفر عليه *** ليه كلام الناس اعيش عليه

مش عايز اكون بدايتى زى نهايتى !!!

الحياة اصلا سلك متلخبط *** او باب مكسور عليه الناس بتخبط

محدش ناوى يعبرك *** حتى الدعوة اللى كانت بتصبرك :/

استخسروها حبايبك فيك *** دة حتي الضحكة مش طالعة ليك

خلاص خسرت الناس بغبائك *** متقولش مقصدش ابقي افهم الاول كلامك

لو انت شاطر فك السلك *** و حول ضحكتهم من ايجار لملك

بقيت عايش في حالة شيزوفرينيا !!! *** يعنى الصبح العن حياتى وبليل اقول يا محلاكى دنيا

يعنى ابقي عيل وانام بدري *** او اشرب سجاير واخلى الدحان يسقف في صدري

الناس تضحك وتقول دة بقي من المجانين *** متتهمونيش بالذنب انت اللى مذنبين

اصلي كنت عايش وبهتم ب اللى يريحكوا *** م لو معملتش مش هسلم من لسانكو

  
        اعمل الصح يستهزوا بيا *** اعمل الغلط يكفرونى ويلعونى فيا

           
        يبقي انتوا مصابين فعلا بالشيزوفرنيا

بص علاجها ساهل متقلقش .... ابعد عن الناس وخليك بعيد !!!!

وان حد كدبك متدققش .... يعنى اعمل اللي يريحك وخليك عنيد

اعتبر كلامهم دة ولا حاجة *** يعنى حط قلبك في التلاجة

ريح دماغك من الكلام *** م انت ياما سمعت منهم خدت ايه غير الكلام

اهم حاجة ترضي اللى خلقك ارضي ربك *** اصللك لما تتزنق هو بس اللي هيبقي جنبك

                          

 لا اللى بيكرهك ولا اللى بيحبك

يعنى هتحب وحدك ... 

هتموت وحدك ...

 هتتحاسب وحدك

يعنى اعمل كل اللي في باللك متسيبش حتى ثانية

مهياش مستهلة تعيش حياتك في شيزوفرينيا J

خلاص معدش حد قابلني *** دة حتى خيالى بقي لاعنى

                  ومفارقني  و زعلان مني

ولساني بيقولى سكت خيالك الملعون *** سكتوا بدل م يتهموا بالجنون

ويدور الفكر ... واشوف المكر ... ولسانى يفكر خيالي بالسكوت

خيالى مريض ... بعيد ووحيد ... فاضلو ضربة ويبقي حالو الموت

ارفضونى واكتمونى وجننونى  ياناس مخابيل !!!

اصلي مهما كنت طيب مش هكون اطيب من هابيل!!!!

خلاص لسانى تقل علي الكلام  *** يعنى خيالى مات وارتضيت بالنظام

جتتى اتعدمت منها العافيه ... وحتى الكحة بالعافية .... والضحكة مهياش صافية

انا اتجنيت بكلم حالى وانا في البيت واستحمل مادام بالسكوت ارتضيت

وكلامى بقي ليه فاتورة *** والدمعة اللى كانت ليا بقيت مكسورة

كون م تكون ف انت معدوم الخيال ومعدوم الخيال فهو شيطان ملعون

ضحكتى بقت مليانة حزن ***لما الغريب بقي هو اللي بيحن

لما ابكى بقي عدوى هو اللي بيئن**حتى خوفك ع حبيبك سموه زن

لما كلام الهجاصين سموه فن***لما اجمل بيت بيجمع الحبايب سموه خن

               بزمتكو مش دة كلام يركبنا الحزن

ليه يا ناس وشوشنا بقيت مش هى هى ***ليه الضحكة بقيت صفرة ووهمية

طيب حتى نحافظ ع الضحكة وتبقي حقيقية***دة هى اللي فاضلة لينا من الدنيا ديا

شكل الضحكة اللي بفرح ماتت و مبقاش ليها دية***يا شيخ طب حتى خليها ليومك خلفية

خلاص بقي ضحكتى بقيت حزينة***لما بقي الاخ ممكن يقتل اخوه ويمسح في هدومه السكينة

ليه غضب ربنا بقي كبير اوي علينا ***م احنا اللي شيلنا نفسنا حمل اصلا مش لينا

احنا في زمن اتبدلت فيه اسامينا ***مبقيناش بنفكر في اللي عايشين حوالينا

اسال نفسك ليه ها ليه بقينا كدة ***ولادى بقيت موضة الزمن دة

ضحكتى اتبدلت من فرحة كبيرة ل دمعة كبيرة **دة خيبتنا هى اللي بقيت تقيلة

متروحش للخاين تحكى سرك وترجع ع الناس تلوم ***يا ناس هطق هطلع من الهدوم

يا اخى دة احنا عارفين ان الخاين ملوش لزوم**وانت رايح جاى عليه كل يوم

                 يبقي نفسك هى اللي عليها اللوم

ضحكتى بقيت ملهاش طعم ***لما كلمة بحبك بقيت بتيجى بالهم

بقي اللي بيقول بحبك كداب وبيخم ***حتى ضحكة الحبايب بقي غم

عرفتو ضحكتى بقيت ليه مليانة حزن !!!!!!!!!!!!!!!!

لما ابتدى صوت القصف *** ابتديت وياه في العزف

                العزف علي اوتار نهايتي

ناى وبيانو ... وشوية كلام كانوا ... محبوسين *** ضحكة ... وربكة ... وفي السكة ناس مهزومين

         ونزلت الستارة و ابتديت حكايتي

حكايه كانت في الشام *** قول جنة قول احلي كلام

               وصوت عيال طالعة تقول يسقط النظام

ابتدى الرد في دقيقة *** ومات ويا العيال ضحكة بريئة

وابتدا الضرب ... واتجمع الناس كسرب .... اللي يقولك دى مظاهرة ولكنها حرب

                         ابتديت الحرب

وانا عازل معيش سلاح *** قالولي حارب قلت هحارب من غير سلاح

سلاحى هتافي والهتاف مهوش حرام *** دة شوية حماس في الكلام

             اكمنى قولت يسقط النظام

ولسة الحرب دايرة وسايرة في طريق مسدود

ولكي الله يا سوريا مع نظام فكره محدود